Это диво-растение лён

Праздник льна. «Лён вежалун» состоялся в Коми-Пермяцком этнокультурном центре. В рамках праздника прошел семинар «Особенности национального костюма», а также мастер-классы по темам: «Кубовая и Верховая набойки», «Льняная кукла «Акань»; «Льняные блюда». Завершился праздник концертной программой и презентацией фильма «Живая набойка»

Коми-Пермяцкöй этнокультурнöй центрын чулалiс «Лен вежалун» нима мероприятие. «Особенности национального костюма на примере русского и коми-пермяцкого», сэтшöм тема вылö семинар оссис «Лен вежалун» нима мероприятиелöн рамкаэз пытшкын. Семинар лоис программаись öтiк торöн, кöдасянь и пондöтчис вежалунся мероприятие. Педагогическöй наукаэз сьöртi кандидат Надежда Мальцева паськыта висьтасис набойнöй ремесло и коми-пермяцкöй орнамент йылiсь. Семинарлöн участниккезлö вöлiсö преставитöмöсь быдкодь бытшöм коми-пермяцкöй и роч костюммез. Но, а Рыбинск карись художник-модельер Нина Носкова мыччалiс сэтшöм жö бытшöм костюма традиционнöй аканнез.

Мыйöн вачкисьö и мый неöткодьыс роч и коми-пермяцкöй отирлöн паськомын, эта тема вылö мунiс ыджыт дискуссия. Семинар шогмис тыра быд ладорсянь.

Годiсь годö народнöй костюм дынö интерес содö, быдмö и популярность. Популярнöйöн талуння лун вылö лоис и коми-пермяцкöй культура и быдöс, мый сыкöт йитöм.

Вежалун коста чулöтöм мастер-классэз мыччалiсö ленлiсь ассямасö. Мастерскöй, кытöн керисо куклаэз, уджалiс квать, а то и кыкьямыс киö, сымда желающöйез адззисисö мастеритны ленiсь аканьöс.

Лöсьöтiсö татöн и экологическöй матег, пуисö сiйö отирыс ордчöн мастеркöт. Творество эз тöд границаэз. Этнокультурнöй центрын мыччалiсö быдöс, мый туйö керны ленiсь. И нельки рецепттэз, кыдз натуральнöй продукт пыртöны кулинарияö, и мый чöскытыс этаись шогмö.

А изюминкаöн вежалун вылын лоис набойка. Сiйö Коми-Пермяцкöй этнокультурнöй центрись уджалiссез исследуйтiсö да ловзьöтiсö, сы йылiсь жö лöсьöтiсö фильм и мастер-класс, кытöн мыччалiсö верховöй и кубовöй набойкалiсь технологиясö.

«Лен вежалун» - этö кыкöт краевöй праздник. «От льна долгунца до полотна» нима проектлöн финальнöй мероприятие. Сы вылын мыччалiсö быдöс, мый вöлi тöдöм да исследуйтöм. Планнэзын осьтны лаборатория, кытöн пондас зорамны набойка сьöртi технология и пондас керсьыны быдöс, мед коми-пермяцкöй культура олiс и крепамис вужжезнас.