Капитальный скандал

Жильцы многоквартирного дома в селе Кочево отказываются платить за капитальный ремонт. Всему виной некачественный ремонт дома.

А гажыс вöлi недыр.

Кочево посадiсь уна квартираа керкуись олiссез керкулöн капитальнöй ремонт бöрсянь дыр гажöтчыны эз ештö. Строителлез керкулiсь фундаментсö эз кисьтö, важ балконнэсö дзимлялiсö, а виллесö бöр эз керö да и сайдингыс мукöдлаын усьö ни. А сэтчö эшö и öтласа имуществолöн капитальнöй ремонт вылö квитанцияэз локтiсö. Отир примитiсö решеннё, что öнi нiя вештыны этна квитанцияэз сьöртi оз пондö.

Этшöм решеннё примитiс керкуись быд олiсь. Нiя шуöны, мый ремонт бöрсянь лоис эшö умöльжык. Сiдз ремонт бöрсянь крышаыс кыдз виялiс, сiдз и виялö. Зэррез коста подъездын пукалö ва. Сiйöн отир и юасьöны, кытчö мунö ремонт вылö öктöм сьöмыс.

Кыдз шуö Анна Санникова, ремонт бöрсянь керкуас лоис эшö кöдзытжык. Горсö лонтны öнi колö тшöкжыка, а этö виль расходдэз.

Неöтпыр норасисö отирыс керöм ремонт вылö местнöй чиновниккезлö. Кыдз шуö поселеннёöн юралiсь Александр Павлов, медбы керкуас керны бур ремонт, деньгаыс эз вöв, этасянь и уджлöн эттшöм качество. А öнi отирыслö колö вештыны квитанцияэз сьöртi. Этö быд месяц мортсянь квадратнöй метра понда сизим руб. А оз кö пондö вештыны, нiя дзугасö федеральнöй закон.

Если жö аркмöтны управляющöй компания, то пондас ковны видзны руководительöс или бухгалтерöс. А этö виль расходдэз. Если жö сьöмыс пондас мунны краяс, то ремонтсö дыр видзчисьны пондас ковны. Ну а кытчöдз жö уна квартираа керкуись олiссез вештiсьны оз мöдö. Нiя перво тöдöны бы, лоас я виль программаыс эффективнöйöн, и оз я понды керкуныс виль капитальнöй ремонт бöрсянь вачкисьны кыдз бомбёжка бöрсянь.