В Кудымкаре затопило несколько домов

В Кудымкаре из-за прошедших проливных дождей река вышла из берегов. Затопленными оказались несколько домов.

Зэррез кöсйöны кольны отирсö карчтöг. Карын олiсь Тамара Седеговалiсь керкусö таво тулысся ыджыт ваэс орддисö. Но вöр-ваыс бергöтiс быдöс гожум шöрö. Быдсöн карчйöрыс, керкуыс да мöдiк постройкаэз шедiсö ва увтö. И не сылöн öтнаслöн.

И быдöс сысянь, что неыджыт ю Олыч петiс аслас береггезiсь. Ваыс ыждiс не сылöм лымсянь, кыдз этö овлö тулыснас, а вына зэррезсянь, кöдна кыссисö кык лун сьöрна. Инька тöдвылын эттшöмыс шогмис нёльдас вит год коста медодззаись. Аслас имущество понда Тамара Ивановна оз тöждiсь. Полö дзик сыись, что вермас кольччыны карчтöг. Зэрыс колис ни инькасö ягöдтöг, а эд вермас и картошкаыс сiсьмыны.

Отир керисö нельки фотографияэз, кöдна вылын тыдалö, кыдз ваыс пырöм керкуэзö. Öнi валöн уровеньыс чинiс. Но гöппес öнöдз сулалöны керкуэз гöгöр. Уль да ва и джоджуллэзын. Кыдз шуö Светлана Иванова, эттшöмыс дынö нiя готовöсь эз вöлö. Июль месяцö кöть и зэрасьö, но эттшöм вына зэррез одзжык эз вöлö. Öнi жö кытчöдз погоддяыс сувтчис, и енöжыс мичамис. Только вот прогнозыс гажöтны оз вермы. Одззася шоччисян луннэзö Пермскöй крайын усис валöн месячнöй норма. Ыджыт зэррез увья ва увтö шедiсö Оханск, Кудымкар, Гайны да Кочево. Öнi жö кытчöдз ситуацияыс лоис стабильнöй. Но синоптиккез вились кöсйöны кöдзыт погоддя да зэррез.

Кöть частнöй секторын ваыс и чинiс, Иньва юын сылöн уровеньыс öнöдз вылын. Öнi администрацияись уджалiссез нуöтöны контроль и меряйтöны валiсь уровеньсö лун вылас куимись. Если ваыс вились петас аслас береггезiсь, лоасö примитöмöсь быдöс колана мераэз.

Ну а сiя жö Тамара Седеговаыс шуö, если и одзлань пондас этадз зэрасьны, сылiсь керкусö вились вöтяс. Кöть имуществоыс сылöн страхуйтöм, но вештöм сьöмыс вермас и не тырмыны, если ваыс огоречсис быдöс карчсö кылöтас