Дöра кыйöм

«Город мастеров». Проект с таким названием реализует Министерство по делам Коми-Пермяцкого округа.

Дöра кыйöм. Коми-Пермяцкöй округлöн делоэз сьöртi министерство уджалö «Город мастеров» нима проектлöн реализация вылын. Тавося год кежö бöрйöм öтiк направленнё – этö дöра кыйöм. Моггез судзöтöм понда чулöтчöны быдкодь мероприятиеэз.

«Город мастеров» нима проектлöн жö рамкаэз пытшкын Россияись дöракыйиссезлöн медодзза форум вылö вöлi иньдöтлöм Пермскöй крайлöн народнöй мастер Галина Казанцева. Öнi сiя гортнын ни и вовлiс министерствоö, медбы висьтасьны проектлöн учредителлезлö да исполнителлезлö форум йылiсь. Чулалiс сiя Чувашия Республикаын и öктiс Россиялöн уна регионнэзöсь мастеррезöс.

Форум чулалöма медодззаись. Мастеррез неделя сьöрна велöтчисö виль кужöммез дорö, быдыс мыччалiс ассис ассямасö. Занятиеэз коста вöлi керöм вывод, мый пантасьöм зэв тöдчана да колана, сiдз кыдз уна йöзлöн эм желаннё зорöтны мам муэзлiсь культура. Вöлi пасйöм, мый мероприятие лоас быдгодся.