Конёккез вылын ысласьöм карын оз öшты ассис популярностьсö

Öнi ни челядь ёна видзчисьöны катоклiсь осьтöм. Позьö казьмöтны, мый матын кадö «Парма» нима стадион вылiсь йы панталас медодзза ысласиссезöс. Этна луннэзö стадион вылын пизьö удж. Öнi татöн лöсьöтöны ысласьöм понда крепыт волькыт йы. Удж эта дöнзис медопытнöй уджалiссезлö. Мастерлöн, кöда, кыдз шуам, «быдтö» этö йысö, пельпоннэз сайын кыкдас годся стаж, сiйöн киськалö катоксö сiя кужöмöн. Мороззэз этшöм удж понда - медбур условие.

Йы колö киськавны кыкдасiсь, нето унажык. Кад эта вылö мунö тырмöмви. Лунтырöн шогмö киськавны дзир витiсь, но качественнöя. Медшорöн эстö лоö бура керöм основанне. Сiйöн тöвбыт татöн пондас уджавны конёккезлöн прокат. Кыдз баитöны стадион вылiсь уджалiссез, каток осьтöм бöрсянь пондöтчас челядьлöн медгажа кад.