Вышла в свет коми-пермяцкая классика

Вышла в свет коми-пермяцкая классика. В Коми-Пермяцкой центральной библиотеке имени М.Лихачева прошла презентация четырех книг коми-пермяцких классиков: Михаила Лихачева, Андрея Зубова, Степана Караваева и Николая Попова.

Виль небöггезлö – бур туй! Тöдчана лунöн, кöдö видзчисисö коми-пермяцкöй кыв да литература велöтiссез, лыддьöтiссез и радейтiссез, лоис коми-пермяцкöй классиккезлö посвятитöм сборниккезлöн презентация. Идея, лэдзны эттшöм сборниккез шогмис Коми-Пермяцкöй округлöн делоэз сьöртi министерстволöн, сьöмöн отсалiс крайлöн внутренньöй политика сьöрт1 департамент. Öнi Андрей Зубовлöн, Михаил Лихачевлöн, Степан Караваевлöн да Николай Поповлöн творчество пыдына мыччалöм виль небöггезын.

Сборниккезын печатайтöмöсь не дзир авторрезлöн произведеннёэз. Сэтчö пыртöмöсь биографическöй справкаэз, критическöй публикацияэз да современниккезлöн касьтылöммез, сiдзжö эмöсь уна фотографияэз, этö быд гижисьлöн челядься кад, горт, школа, сiя, мый кольччис архивын.

Сборниккез лоасö интереснöйезöн быдöнныс понда, кин радейтö поэзия да проза, кинлöн сьöлöм доймö коми кыв да литература понда, быд небöг петiс тысяча экземпляра тиражöн. Быдöссö петiсö нель тысяча сборник. Ны вылын уджалiс ыджыт редакционнöй отдел, бура отсалiсö велöтiссезлöн велöтан институтiсь уджалiссез. Ыджыт вын, бур юрвеммез да тöдöммез отсалiсö йитны коми-пермяцкöй классика öтiк серияö. Туйö висьтавны, мый бöръя годдэз сьöрна коми-пермяцкöй небöггез лэдзöм вылын удж пондiс мунны буржыка да паськытжыка.

Презентуйтiсö виль небöггез горöна и торжественнöя. Эта уджыс Коми-Пермяцкöй этнокультурнöй центрись редакционно-издательскöй отделлöн не медбöрья. Кытчöдз тырмö вын и лоасö сьöм, отсöт да мог, коми-пермяцкöй кыв вылын литература пондас петны и одзлань.