Сельская спортсменка стала шестой на международном марафоне

Сельская спортсменка стала шестой на международном марафоне. На первом международном марафоне «Европа-Азия», который состоялся в Екатеринбурге, в забеге на 42 километра среди трех тысяч участников, в числе которых лучшие марафонцы планеты - бегуны из Кении и звезды Российского спорта, спортсменка из Кочево Татьяна Чугайнова взяла 6 место.

Кочевскöй спортсменкалöн виль победа. Ассис медодзза кубоксö Кочевоись Татьяна Чугайнова шедтiс Россиялöн чемпионат вылын эшö школаын велöтчикö. Ыджыт да шöрöт дистанцияэз вылö котрасьöмöн пондiс занимайтчыны сiя учöтсянь. Эта кадсянь спортсменкалöн пызан вылын абу куш места, сымда сылöн öксисö быдкодь наградаэз да кубоккез. А неважын сiя шедтiс ас понда эшö öтiк победа.

«Европа – Азия» нима медодзза международнöй марафон вылын, кöда чулöтчис Екатеринбургын, нельдас кык километра дистанция вылын Татьяна локтiс финиш вылö кватьöтöн. Быдöссö жö этö дистанциясö котöртiсö куим тысяча гöгöр участник, кöдна коласын вöлiсö мушар вылiсь медбур марафонеццез.

Асьсö жö Татьяна профессионалöн оз лыддьы. Сiдз кыдз спортлö луннас сетö дзик кык час гöгöр, остальнöй кадсö сiя видзö удж да семья вылö. Татьяна кыввез сьöртi, тренировкаэсö сiя чулöтö котрасян туек вылын, а марафонскöй дистанцияэз кежö лöсьöтчикö петö туй вылö и котöртö ордча поселеннё дынöдз, этö кытöнкö кыкдас километра гöгöр. Сiдз жö котрасьö и вöрын. Эд кыным сьöкытжык тренировочнöй трасса, сыным кокнитжык лоö котöртны соревнованнёэз коста. Кыдз шуö сельскöй чемпионка, вермасьöммез вылын главнöйыс сы понда не победа, эд спорт сы оланын кыдз хобби да оланлiсь здоровöй образ видзöм. А котрасьöм дынö радейтöм зорöтiс сыын эшö челядь кад коста сылöн тренер.

Пермскöй крайись международнöй котрасьöмын участие примитiсö куим спортсмен. Татьяналöн результат – куим час нёль минута дас секунда. Эз ешты спортсменка бертны гортас, кыдз кутчисис виль тренировкаэз бердö. Кыдз шуö ачыс, сувтчыны эта результат вылын оз понды, эд одзлань сiйö видзчисьöны виль вермасьöммез, кöдна вылын сiя пондас стремитчыны мыччавны эшö буржык результат.