С миру по нитке

С миру по нитке. Не дождавшись помощи от местной власти, жители деревни Афонино Юсьвинского района начали строить единственную дорогу собственными силами и за свой счет.

Ас вынöн туйö и керöссэз бергöтны. Неыджыт Афонино деревня дынöдз, кытöн вöлi аркмöтöм «Рассвет» нима приют, локтны туйис одзжык только кöс погоддя коста. Приютын олiссез ас вынöн решитiсö вайöтны туйсö нормальнöй состояннеöдз. Эд отирыс татöн годiсь годö содöны. Öнi постояннöя эстöн олöны куимдас нёль морт. Öнi видзчисьöны виль олiссезöс. Эстöн аслыныс оланiн адззöны нiя, кинлö колö отсöт: инвалиддэз, керкутöм отир. Олöны эстöн общинаöн. Асьныс быдтöны карч, ловзьöтiсö чапкöм деревнясö. Нач неважын приютлö тырис дас год. Асланыс медодзза ыджыт юбилей кежö лöсьöтiсö ю весьтöт пос, керисö öтöрын освещенне. Öнi шöр могöн лоö лöсьöтны туй.

Официальнöя, Афонино деревняöдз туйыс абу. Одзжык ветлöтiсö ыб кузя. Öнi приютын олiссез, кин вермö, уджалöны туй вылын. Зэрикö и тöла погоддяö дзимлялöны пуэз, керöны дренаж, пöрöтöм пуэзöн тыртöны ямаэз. Сiдз жö лöсьöтöны площадка, мед серöнжык вайны сэтчö гравий.

А вот местнöй властьсянь абу некытшöм отсöт. Шыöтчывлiсö быд год. Ответ вöлi öтiк – абу сьöм. Мед строительнöй материаллэз вылö öктыны сьöм, ыстiсö юöр быдлаö. Отсöт локтiс кыдз краевöй чиновниккезсянь, сiдз и простöй отирсянь. Кин тысяча рубöн ыстiс, кин кынымкö сотняöн. Татьяна Юнусова кыввез сьöртi, туйез районын - медшöр проблема. Сiйöн медодззаэз коласiсь и локтiс отсöт вылö.

Приют аркмöтiсь Валентина Овчинникова шуö, что кöть быдсöн сьöмсö эз вермö öктыны, туйсö лöсьöтасö таво ни. И кöть районлöн бюджетын сьöмыс и абу, а ас приютöдз керны туйсö нiя асланыс вынöн сё ни вермасö.