Аты-баты …

«Кто шагает дружно в ногу…» В рамках года патриотического воспитания на базе Кувинского загородного лагеря прошли военно-полевые сборы.

«Аты-баты …» Кыдз и быд военнöй лагерьын эта нёль лунся лагерьыс сiдз жö оссис построеннёсянь. Кува посадын кар сайись шоччисян места öктiс ас дынас витдас кыкьямыс пиöс. Медодзза лунö, пятницаö, татöн нiйö панталiсö кыдз военнöй отир, сiдз и юралiссез.

Мед челядь вермисö куравны военнöй тöдöммез тыра мераöн, ныкöт пантасьöм вылö вовлiсö полицияись быдкодь специалисттэз. Эксперт-криминалист тöдсöтiс лагерись воспитаниккесö криминалистлöн уджöн, а вневедомстеннöй охранаись сотрудник нельки сетлiс меряйтны бронежилет. Тöдсасисö челядь эшö и кинологлöн уджкöт. Овчарка Вега мыччалiс быдöс, мый дорö велöтiсö сiйö правоохранительнöй органнэзын. Быдöс мыччалöмыс челядьлö ёна гленитчис. Нiя тöдiсö кинологсянь быдöс, мый дорö велöтöны поннэзöс полицияын.

Эттшöм виль тöдöммез пиэзлö пыр лоöны интереснöйезöн, отсалöны дисциплинируйтны медбöб челядьöс, велöтöны лоны мывкыдаэзöн да вынаэзöн. И быдöс эта лоис сьöлöмви кыдз зоночкаэзлö, сiдз и нылочкаэзлö.

Сiдз кыдз тавося годыс образованнёын шуöм патриотическöй воспитаннелöн годöн, этна военно-полевöй сборрез лоöны медодззаэзöн нiя мероприятиеэз коласiсь, кöдна эшö лоасö чулöтöмöсь эта велöтчан год коста.