Тяк-тяк виль черок, гырс-гырс пилаок!

Этна луннэзö Куваись лагерьлöн база вылын öксьылiсö Кудымкарскöй районiсь уджалiсь отир. Эстöн ассиныс мастерство мыччалiсö общественнöй питаннёын уджалiссез, а сiдз жö деревообрабатывающöй предприятиеэзын уджалiссез.

Кувинскöй лагерьлöн столовойын пызаннэз вöлiсö тыраöсь öддьöн басöка лöсьöтöм сёянöн. Мый не блюдо – шедевр. Кувинскöй сельполöн пекарняись уджалiссез торйöтчисö, мый местаын нiя озö сулалö, годiсь год зорöтöны ассиныс производство. Жюри донтiс не дзир этнö пызаннэсö. Поваррез мыччалiсö эшö и сiйö, кытшöм бытшöма нiя кужöны лöсьöтны романтическöй пантасьöм понда пызаннэз. И эстöн вöлiсö сёяннэз, кöдна керомöсь татöн быдтöм продукцияись.

Куимöт пызан öктiс медуна отирсö. Быдöс öксьöммес бöрйисö медчöскыт пельняннез. А вöлiсö нiя пистикись, быдкодь чериэзiсь, тшакись да мöдiк быдкодь парöгись.

А кытчöдз татöн асланыс кужöммезын вермасисö поваррез, öтöрын мунiс мöдiк вермасьöм – бöрйисö Кудымкарскöй районiсь медбур столяр – плотникöс. Мастеррез мыччалiсö ассиныс кужöммезнысö лабиччез керöмын. Кыдз шуисö предпринимателлез, этшöм пантасьöммез öддьöн коланаöсь, эд ны коста мастеррез торйöтчöны öтамöдкöт асланыс кужöммезöн. Быд лабич петiс öддьöн ассяма, сiйöн вöлi мый вылö уськöтны дзарньöв. Эна мастеррезлöн киэз увтiсь петöны бытшöм öшыннэз, крепыт ыбöссэз, лэбтöны нiя и керкуэз.

Кыдз шуись районöн веськöтлiсь, этшöм вермасьöммез пондасö чулöтчыны Кудымкарскöй районын и одзлань, эд нiя отир понда öддьöн коланаöсь.