Лён вежалун

Кудымкарись этнокультурнöй центр лöсьöтiс проект, кöда шусьö «От льна-долгунца до полотна», и кöда лоис «Культурная мозайка» нима всероссийскöй конкурсын вермисьöн.

Тöдсасьны лёнкöт эта лунö Коми-Пермяцкöй этноцентрö «Лён вежалун» праздник вылö локтiсö уна йöз. Пондöтчис луныс выставка осьтöмсянь. Татöн вöлiсö представитöмöсь лёнiсь керöм öнняся, а сiдз жö важ кадся берсяыс.

Сiдз жö эта лунö чулöтчисо мастер-классэз. Округись мастерицаэз велöтiсö серöтчыны лёнiсь дöра вылын. Мöдiк пызан сайын лöсьöтiсö акань-оберег. Сэтшöмсö керлöмась миян баббезным, медбы дорйыны инькаэзлiсь здоровье. Куимöт мастер-класс вылын отир велöтчисö асьныс кыйны дöра. Эта понда торя жырын вöлiсö сувтöтöмöсь станоккез.

«От льна долгунца до полотна» - проект öддьöн паськыт. Кыссис сiя дыр и сы рамкаэз пытшкын вöлi кöдзöм лён, кöдöн öнi уджалöны быдкодь мероприятиеэз коста. Эшö öтiк шор событиеöн лоис этноцентрын музей осьтöм.

Проект коста сiдз жö вöлiсö лöсьöтöмöсь небöг да диск. Нылöн презентация сiдз жö чулалiс эта лунö. Этноцентрись уджалiссез асьныс лöсьöтiсö фильм, кöдаын ассямаа висьтасисö сы йылiсь, кыдз быдтiсö лён важ каддэзö да мыччалöм сылöн обработкалöн технология.