Бур оценка вылö!

Кочевскöй районiсь Пелым посадын пöрись отир да инвалиддэз понда пансионатын чулöтсисö ученнеэз. Керкуын уджалiссез да пожарнöйез зорöтiсö ассиныс навыккез би кусöтöмын да отирöс эвакуацияын.

Легенда сьöртi пожар пондöтчис керкулöн мöдöк этаж вылын. Эвакуация бердö кутчисисö пожарнöйез да керкуын уджалiссез. Норматив сьöртi нiя долженöсь вит минута коста петкöтны керкуись нёльдас квать мортöс.

Тревога коста унажык пöрись отир петiсö керкуись асьныс, а нiйö, киннэз ветлöтны оз ни вермö, петкöтiсö носилкаэз вылын интернатын уджалiссез. Места вылö локтiс пожарнöй машина. Боевöй расчет нюжöтiс пожарнöй рукаввез. Ученнеэз кыдз пондöтчисö, сiдз и чулöтчисö чожа да казявтöг.

Кыдз и быдлаын, ученнёэз Пелымскöй интернатын чулöтчöны год вылас кыкись. Чрезвычайнöй ситуацияэз коста ыджыт мог сулалö персонал одзын. Бöрья тренировка мыччалiс, мый нiя справитчисö сiйöн не умöля.

Бöрья кадö противопожарнöй мероприятиеэз вылö сетчö уна сьöм, кад да вын. Медбы орддьыны чрезвычайнöй ситуацияэз, отирлö, кöдна уджалöны социальнöй объекттэзын, колö тöдны да соблюдайтны чорыт требованнеэз.

Эта уджын öтлаын МЧСкöт зэлыта да конструктивнöя уджалöны ВДПОлöн специалисттэз. Нылöн шöр мог - предупредитны пожар да велöтны отирöс пессьыны сыкöт.