Пондöтчис Всероссийскöй олимпиадалöн муниципальнöй этап

Медодзза предмет, кöда сьöртi челядь гижисö олимпиаднöй удж, лоис биология.

Медодзза олимпиаднöй удж гижисö öкмысöт, дасöт да дасöтiкöт классэз. Заданнёэз вöлiсö лöсьöтöмöсь кыдз школьнöй программа сьöртi, сiдз и нiя, кöдна сы пытшкö оз пырö. Сiйöн эта мероприятие кежö школаэзiсь велöтчиссез лöсьöтчисö бура.

Кыдз шусьö топинамбурлöн плод, мый оз лö ядролöн органоидöн, кайезлöн вын да эшö уна мöдiк ассяма юасьöммез вöлiсö пыртöмöсь всероссийскöй олимпиадалöн муниципальнöй этаплöн тестö. Удж вылö быдöнныслö вöлi сетöм кык час. Думайтöм да правильнöй ответ бöрйöм понда эта кадыс лоö тырмöмви.

Сэк, кöр быдöс олимпиаднöй уджжез Кудымкарын лоасö гижöмöсь, медбурресö бöръясö олимпиадалöн региональнöй этап вылö, кöда чулöтчас Перемын.