«Бичиру» - 25!

«Бичиру» - 25! Народный фольклорный ансамбль «Бичир» деревни Кекур Кудымкарского района отметил 25-летие.

Кудымкарскöй районiсь Кекур деревняись «Бичир» нима народнöй фольклорнöй ансамбльлö тырис кыкдас вит год. «Бичир» нима фольклорнöй ансамбльлöн гажа да тыра творческöй олан пондöтчис Александра Алексеевна Климовалöн кокнит кисянь. Александра Алексеевна быдöс олансö уджалiс школаын, вöлi öддьöн талантливöй да активнöй мортöн, веськöтл!iс «Бичирöн» кыкдас год гöгöр да пуктiс сылöн творческöй зоралöмö ыджыт пай. Чулалöм годдэз коста коллективöн керöм ыджыт творческöй удж. Адззöм да ловзьöтöм не öтiк дас важ сьыланкыв. Талуння лунö репуртуарын нiя öкмысдас гöгöр, унажыкыс кöда коласын коми кыв вылын.

Бöрья кадö, кыкъямыс год ни, коллективöн веськöтлö, Коми округын уналö тöдса отирлöн творчество сьöртi вына специалист Валентина Денисенко. Сы кипод увтын «Бичир» петiс аслас исполнительскöй искусствоöн виль уровень вылö.

2008 годö ансамбльлö вöлi сетöм заслуженнöй ним «Народнöй». Коллективлöн пондöтчис ыджыт гастрольнöй деятельность. Кекурскöй ансамбль тöдöны да радейтöны Парма мулöн быд пельöсокын. Нiя вöлiсö фестиваллез вылын Россиялöн уна регионнэзын. А таво тулыснас С-Петербургын «Малахитовая шкатулка» нима фестиваль вылын нылiсь творчество донтiсö медвылына.

Коми-Пермяцкöй культура да искусство зорöтöм да отирлöн творчествоö пуктöм пай понда коллектив не öтпырись вöлi наградитöм быдкодь грамотаэзöн да дипломмезöн. Но, кыдз лыддьöны коллективлöн участниккез, медыджыт козинöн да признаннёöн коллективлö лоис Кекурын строитöм этнокультурнöй центр.