Письмо «турецкому султану»

Письмо «турецкому султану». В Кудымкарском районе жители собирают подписи под обращением в краевой минздрав. В сельских ФАПах сокращают штат сотрудников.

Кудымкарскöй районiсь ФАП-пезын лöсьöтчöны чинтны уджалан местаэз. Кудымкарскöй районiсь Полва посадiсь Аликиннэз гозъя понда посадын физиотерапевтическöй кабинет пöдналöм йылiсь юöр лоис нач видзчисьтöмöн. Светлана Аликиналöн жöникыс – первöй группаа инвалид и сылö медицинскöй отсöтыс колö пыр.

Öнi Полваисьфельдшерско-акушерскöй пунктын уджалöн куим специалист. Нiя сетöны отсöтсö кыдз Полваын, сiдз и вит матiсь деревняэзын олiссез понда. Быд лун физиотерапевтическöй кабинетö локтöны дасвит гöгöр морт. Надежда Коньшина уджалiс сэтöн куимдас куим год. И если сылiсь должностьсö чинтасö, сiя кольччас уджтöг, а адззыны мöдiк уджалан места посадын öддьöн сьöкыт.

Ну а отирлö процедураэз вылö ковсяс ветлöтны ордча посадö, и керны этö лоас не кокнит. Эд сулалö сiя ны дынсянь кыкдас вит километра ылынаын, а автобусыс ветлöтö ны дынöдз неделя вылас куимись и то не пыр.

Центральнöй районнöй больницаын некытшöм комментарийез сетны эз пондö, дзик висьталiсö, что омöн Кудымкарскöй район пасьта сокращеннёыс лоас дасöкмыс ФАП-ын. Сэтчин кольччасö дзик öтiк специалистöн. Кытшöм причина увья эта керсьö, кытчöдз невежöртана. Но кыдз шуöны сельскöй поселеннёэзiсь специалисттэз, эта сокращеннеыс бура шыöтчас поселеннеэз вылын.

А мукöдыс пондiсö ни думайтны сы йылiсь, медбы вежны олан места. Эд овны медицинскöй отсöттöг нылö лоас öддьöн сьöкыт. Кинкö жö гижö местнöй депутаттэз дынö обращеннеэз и надейтчö, мый здравоохраненнёлöн министерствоын нiя лоасö кылöмöсь и сельскöй ФАП-пезын оз лоö некытшöм сокращеннеэз.