Пляж, солнце и вода

Пляж, солнце и вода. В Кудымкаре официально открыт купальный сезон.

Ю, ва да шондi. Кудымкарись купайтчиссез радейтна пляжнöй сезон ас пондасиныс важынни осьтiсö. Шлюззэз вылын пондiсö купайтчыны эшö официальнöй постановленне гижöм вотöдз. Шлюззэз дынiсь Кува ю вылiсь пруд бöръя кадö лоис медпопулярнöй гожумся шоччисян местаöн. Пляжнöй сезон пондöтчöм вотöдз, шондiа луннэзö, эстöн пыр вöлiсö уна отир. Купайтчиссез ассиныс сезон осьтiсö асьныс, нельки кык неделя вылö одзжык, нежели этö керис карись администрация.

Гожум челядь видзчисисö кузь тöв и юасьны, туйö купайтчыны или оз, нiя некöр оз тэрмасьö. Пруд дынын гажа быдöнныслö. Сiйöн и купайтчöмын отир аслыныс оз откажитö. Челядь татöн шоччисьöны да орсöны пöттöдз. Öнi туйö баитны ни валöн показателлез йылiсь, эд валöн анализ сьöртi результат лоис тöдса. Сiйöн купайтчан сезон осьтöм йылiсь решенне вöлi примитöм торья комиссияöн. Роспотребнадзор указаннеэз эта вылö сiдзжö сетiс. Сiдз кыдз нарушеннеэз абу, купайтчыны пруд вылын туйö быдöнныслö, дзир керны этö колö торья эта понда лöсьöтöм местаын. Но некыдз не гидро-техническöй сооруженнеэз гöгöр, сы дынын мукöдыс купайтчöны, сы вывсянь жö и чеччалöны. И ежели баитны безопасность йылiсь, эта некыдз оз лöсяв колана требованнеэзлö. Ва радейтiсь отир понда эм пляж и мед орддьыны умöль последствиеэз, отирöс корöны лоны законопослушнöезöн.