Геройлöн юбилей

Ноябрь даскуимöт лунö тырис чужанлунсянь öкмысдас год Павел Фёдорович Епановлö. Этö Великöй Отечественнöй войналöн участник, артиллерист, Слава нима орденлöн полнöй кавалер. Геройлöн чужанлунö мам му вылын сiйö касьтылiсö йöз.

Одз асывсянь Белоеваись олiссез öксисö Павел Фёдорович Епановлöн шойна гöгöр. Вайисö дзоридззез, касьтылiсö шоныт кыввезöн, уськöтiсö тöдвылö, кытшöмöн вöлi эта мортыс.

Павел Фёдорович чужис Епанова деревняын, и война бöрсянь бертiс мам му вылö, уджалiс Карбасовскöй совхозын. Öнöдз татöн сулалö керку, кытöн чужис да олiс войналöн участник. Эта керку дынын и чулöтчис митинг. Отир уськöтiсö тöдвылö землякöн керöм подвиггез.

Тöдчана мортöс видзöны тöдвылын и нiя, киннэз вöлiсö сыкöт тöдсаöсь.

Мероприятиеэз вылын вöлiсö и челядь. Белоевскöй шöрöт школаын патриотическöй воспитаннё сулалö шöр моггез коласын. Куим кадетскöй классiсь челядь лоöны этшöм пантасьöммезлöн пырся участниккезöн.

Пермскöй крайын Слава нима орденлöн полнöй кавалеррезöн лоисо ВОВлöн кыкдас вит участник, Коми-Пермяцкöй округын сэтшöммес нёля, ны коласын и Павел Фёдорович Епанов.