Битва кулинаров

Битва кулинаров. В селе Белоево Кудымкарского района состоялся фестиваль коми-пермяцкой кухни.

«Коми сёян батл». Коми-пермяцкöй кулинарной поединок Кудымкарскöй районын чулöтiсö первуись. Фестиваль вылö локтiсö районiсь быдöс поселеннеэз. Квать командаö пырисö медкужись, медтворческöй, сёянын бöрйисись стряпухаэз.

Фестиваль вылын öтдруг оссисö сизим кулинарнöй площадка. Öдззисö уджавны коми-пермяцкöй кухняэз. Кухня вылö мыччалiс нылöн оформленне. Кулинаррез сьöраныс вайисö быдöс, мый хозяйствоын колö коми-пермяцкöй сёян лöсьöтöм понда. Сувтöтiсö горрез, пызан вылö самовар и эшö мод1к колана торрез, кöдна эмöсь керкуын быд бур хозяйкалöн.

Быд команда адззис рецепттэз, кöдна локтiсö миян дынöдз баббез дынсянь. Коми-пермяккез пыр олiсö натуральнöй хозяйствоöн, сiйöн стряпайтiсö татöн дзир натуральнöй продукттэзiсь только коми-пермяцкöй бекöр-паньын.

Кöс тшакись чöскыт икра масьтiсö не только Пешнигортiсь кулинаррез, этö сёянсö, кöдö уна отир лыддьöны деликатесöн, лöсьöтiсö татöн и мöдiк командаэз. Ассяма да аскодя керöм сёяннэз асланыс кöрöн баитiсö ас туйö асьныс. Сiдз жö кулинарнöй вермасьöм вылын мыччалiсö, кыдз керны лукасов, свеклаись шыд, тшöтшкöрись да пиканiсь окрошка и быдкодь бутерброддэз.

Отирлö татöн и былись вöлi мыйö велöтчыны. Быд площадка вылiсь кужись киа стряпайтiссез торйöтчисö асланыс ассяма рецепттэзöн, потшшуйтiсö коми сёянöн, велöтiсö коми-пермяцкöй кулинариялöн мастерство дорö.

Пöжавны коктоинiсь блиннэз татöн и былись велöтчисö первуись. Эттшöм рецепт лоис сьöлöмви и жюрилö, кыдз и уна мöдiккез, кöдна вöлiсö татöн. Сы коста, кöр жюри видзöтiс да донтiс коми-пермяцкöй сёян, шеф-поваррез чулöтiсö мастер-классэз. Кулинарнöй искусствоö велöтiс Константин Мехоношин. Эта площадка вылын озъягöдiсь кöдзыт суп да десерттэз отир панялiсö пöттöдз. Юралiссез жö участвуйтiсö «Медчöскыт окрошка» нима конкурсын. Кужöммез нылiсь донтiсо отир, нiя вöлiсö эксперттэзöн. Статус «бур сёян» сетiсö быд гленитчöм рецептлö.

«Коми сёян батл» нима фестиваль, кöда пырис «59 фестивалей 59 региона» нима фестиваллезлöн лыдö, Кудымкарскöй районын чулалiс вылын уровень вылын. Сiя ловзьöтiс коми-пермяцкöй кухнясö да сетiс кулинарнöй искусстволö виль вын.