Борда ёрттэз йылiсь тöждiсьöм

Кормушки для птиц. Ежегодно учащиеся школы № 1 города Кудымкара на уроках труда мастерят кормушки и скворечники для птиц.

Борда ёрттэз йылiсь тöждiсьöм. Локтiс кад мастеритны кайпоззэз. Кыдз мыччалö практика, нiя вермасö лоны быдкодьöсь. А медбы кайез тöвнас пöтöсь вöлiсö, колö нiйö вердны, эд пуэз вылын кольччом ягöд тырмö не пыр. Карись öтiкöт номера школаись кватьöт классiсь велотчиссез труд урок вылын и кутчисисö мастеритны кайпоззэз да кормушкаэз, мед борда ёрттэзöс вöлi кытöн гöститöтны.

А сiдз кыдз аскöття мастеритны челядь эшö оз кужö, велöтiсь Василий Николаевич Бражкин тöдсöтiс зоночкаэзöс кайпозлöн быд элементкöт. Висьтасис кытшöмöн должен лоны кай понда керкуок и мый оз ков дзугны уджын. А уж интерес эттшöм удж дынö челядьлöн чужис сразу.

Меряйтны сантиметррез, пилитны, волькöтны и нельки серöтны узоррез – эта дорö зоночкаэз велалiсö чожа. Быд пи мастеритiс кайпозсö аслас эскиз сьöртi.

Кыдз баитö Василий Бражкин, шöр торöн лоö сiя, мый ас гöгöрись вöр-ва да быдкодь пöткаэз да кайез дынö радейтöм да бур отношеннё чужö именно эттшöм уджжез кертöн. А кайпоззэсö эта школаын мастеритöны быд год, таво традиция эз дзугсьы.

Öтiк труд урок чулалiс, и аркмисö кайез понда виль керкуоккез. Медодзза мастеритöмсö кватьöт класс котöртiс öшöтны öтöрö. Сэтчö жö челядь крöшитiсö нянь да тэчисö ягöддэз.