Вежöра челядьлöн пантасьöм

Кудымкарын чулалiс «Умники» нима челядьлöн краевöй интеллектуальнöй форум. Вежöра челядь, ыджыт стажа велöтiссез да мöдiк тöдчана отир - быдöнныс нiя öксисö öтласа краевöй интеллектуальнöй форум вылын. Инновационно-образовательнöй мероприятие Кудымкарын чулалö куимöт год ни. Ны вылö велöтчиссез пыр локтöны асланыс ассяма уджöн, кöдö исследуйтiсö, бöрйисö, анализируйтiсö и готовöсь ассяманас тöдсöтны мöдiккезöс.

История, математика, физика, биологоия да мöдiк естественнонаучнöй направленнёэз сьöртi уджалiсö квать проектнöй секция. Ны вылын интелектуаллэз висьтасисö уна интереснöйсö. Искусство да литература нима секция вылын öксьöммезлö гленитчис Наташа Радостеваöн да Таня Кудымоваöн гижöм коми-пермяцкöй костюм йылiсь доклад.

Эрудированнöй челядь немись эз полö. Пермскöй крайись интеллектуальнöй элитаöс, кöда öксис тавося краевöй форум вылын, позьö шуны наукаын бур сменаöн.