Кудымкарскöй районын уджалö «Социальное развитие села» нима программа

Но сылöн реализация вайö отирлö не дзир гаж. 2007 годö Алевтина Боталова пондöтiс строитны керку. Сэк сiя олiс аварийнöй оланiнын. А чиновниккез кöсйисисö «Социальное развитие села» нима программа сьöртi бергöтны инькалö сьöм – видзöм суммаись сизимдас процент. Сьöм сетсис сельскöй хозяйствоын уджалiссезлö. Керку лэбтöм петiс нылöн сизимсё тысяча рубся унажык. Мöдiсö отсавны почти джын миллионöн. Но сетiсö дзир сё квать тысяча руб.

Администрациялöн расчётнöй сметаын тыдалö, мый кытшöмкö причина увья деньга сетöм не керку, а гид строитöм понда. Сертификатлöн сумма должен вöлi формируйтчыны федеральнöй, краевöй да местнöй бюджеттэзiсь. Чиновниккез шуöны, мый эта кадö странаын вöлi сьöкыт олан. Этасянь краевöй бюджетiсь сьöм выделитöм эз вöв. Этасянь öксьöм суммасö торйöтiсö куим семья вылö. Но нiя жö чиновниккезлöн кыввез сьöртi, этнö суммаэсö семьяэз вермисö бы и не босьны.

2014-öй годсянь программа уджалö вились. Шусьö сiя «Развитие сельского хозяйства и устойчивое развитие сельских территорий». Сетны заявка оланiн бурсьöтöм вылö вермасö сельскöй хозяйствоын, а сiдз жö социальнöй сфераись уджалiссез. Государство бергöтас видзöм суммаись сизимдас процентодз.

Эта неделя вылын сертификаттэз получитiсö кыкдас сизим морт. Но бöра аркмисö проблемаэз. Таисья Лесникова заявка сетiс мöйму. Администрацияын сылö шуисö, мый видзчисьны колас дыр, и тшöктiсö строитны асланыс сьöм вылö, нето босьны кредиттэз. Босьтiсö, строитiсö, сертификаттэз локтiсö, но петiс, мый не быд кредит позьö вештыны этшöм сертификат отсöтöн. Сетöны сьöмсö дзир материал босьтöм вылö. Мый керны одзлань Таисья Лесниковалö некин эз висьтав. Кредиттэз да сертификаттэз öнi некычö ни озö пышшö. Öнi öтсалас пöрччавны аркмöм гöрöдсö дзир суд. Талун сертификат получитöм понда очередьын сулалöны эшö öкмыс морт. Вермасö я нiя босьны сьöм, мыччалас кад.