Пермскöй крайлöн народнöй мастер Иван Канюков одзлань зорöтö ассис кужöммез

Умелые руки не знают скуки. Народный мастер Пермского края Иван Канюков осваивает новые технологии изготовления глиняной посуды и обучает гончарному делу белоевских детишек.

Пермскöй крайлöн народнöй мастер Иван Канюков одзлань зорöтö ассис кужöммез. Сiя керö паськытжыкöн аслас изделиеэзлiсь ассортимент. Сiдз жö сiя оз дугды велöтны гончарнöй удж дорö пиэзöс.

Чернолощёнöй керамика лыддиссьö керамическöй элитаöн, шуис мастер. А этадз сiя шусьö сысянь, что сы вотöдз, кыдз сiйö сотны, бура волькöтöны. Керлiсö этшöм бекöрпаньсö и Россияын, вöлi бур традиция Грузияын. А öнi этшöм технология сьöртi керöм дозмуккез пантасьлöны öддьöн шоча. Медодз сысянь, что сылöн öддьöн сьöкыт технология.

Эз дугды керны Иван Иванович и молочёнöй керамика. Эта важ годдэзся технология сьöртi сiя уджалö сiдз жö не öтiк год. Но этшöм бекöрпаньыс абужык крепыт – горö сiйö он ни сувтöт.

Глина дынö радейтöм Иван Канюковлöн вöлi учöтсянь. Сы кипод увтiсь петiсö пермскöй зверинöй стильын керöм быдкодь фигуркаэз. Куимдас годся унажык ни велöтö мастерыс аслас кужöммез дорö и Белоеваись челядёккезöс. Уджалö школаын дополнительнöй образованнё сьöртi велöтiсьöн.

Иван Канюков сёйись керöм аслас твореннёэзöн босьтö медодзза местаэз районнöй, краевöй да всероссийскöй конкурссэз вылын. Локтан месяцö бöра лöсьöтчö столицаö. Москваын чулöтчас «Ладья. Зимняя сказка» нима Россиялöн народнöй художественнöй промыселлэзлöн дассизимот выставка-ярмарка.