Вöрпиэзлöн олан вылö объектив пырйöт дзарньöв

Карись Субботин-Пермяк нима Коми-Пермяцкöй краеведческöй музейын оссис да уджалö «Эти забавные животные» нима выставка.

Сы вылын чукöртöмöсь сизимдасся унажык удж. Нiйö вайисö кыдз фотограффез-любителлез, сiдз и профессионаллэз. Ны коласын Вадим Гребнев, Андрей Конанов, Андрей Ладанов, Оксана Коньшина.

Выставкалöн шöр могöн лоис быд ладорсянь мыччавны ворпиэзлiсь да горт подалiсь, и нельки экзотическöй животнöйезлiсь олан.

Фотовыставка пондас уджавны февраль месяцöдз. Сэк лоасö керöмöсь сы сьöртi итоггез. Позьö уджжесö не дзир видзöтны, но и бöрйыны ны коласiсь нiйö, кöдна медбура гленитчисö да юöртны эта йылiсь анкетаын.