В Кудымкаре из-за паводка введен режим ЧС

Ыджыт ваэз локтісӧ Кудымкарӧдз. Паводок сьӧрті ситуация Кудымкарын чрезвычайнӧй. Заболотнӧй микрорайонісь почти быдӧс керкуэз шедісӧ ва увтӧ. Юрино уялӧ. Да и карын не быдӧс бур.

Кар администрацияын одз асывсянь перыта ӧксис чрезвычайнӧй ситуацияэз сьӧрті комиссия. Кудымкарын пыртӧм чрезвычайнӧй режим. ЕДДС-лӧн бӧрья даннӧйез сьӧрті, Иньва юлӧн уровень кайис кватьсё кык сантиметрӧдз, ва локтіс керкуэз и приусадебнӧй участоккез дынӧ, сійӧн мераэз примитісӧ экстреннӧйезӧ.

Сідз кыдз последствиеэз вермасӧ аркмыны медумӧльӧсь, быд службалӧ, а это: «Чистый город», коммунальнӧй предприятие, муниципальнӧй контроль сьӧрті отдел, полиция, электросеттез и мӧдік организациялӧ сетісӧ указаннеэз.

Юралісьлӧн вежись торйӧтчис, мый апрель 18 лун вылӧ  обстановка гажтӧм и полӧтана.

Шлюззэз вылӧ пондӧтчисӧ ваявны песок. Ӧні уджаліссез вынсьӧтӧны дамба. Сы гӧгӧр жӧ тэчасӧ фундаментнӧй подушкаэз и блоккез. Прогноззэз сьӧрті валӧн уровень эшӧ лэбтісяс, и ежели не блокируйтны,  ыджыт давленне увтын жугдыны сооруженне петас кокнита.

А эта кадӧ Народная улица вылісь оліссезлӧн быдӧс постройкаэз шедісӧ ва увтӧ. Гӧгӧр быдӧс лоис ӧткодь, туйез оз тыдалӧ, а отир старайтчисӧ дорйыны имущество, норасьӧны, что ыджыт ваэз увья уна ни мый тшыкис.

Паводок медодз пондӧтчис ны понда, киннэз олӧны Заболотнӧй да Юрино нима микрорайоннэзын. Быдыс страдайтӧ сы увья асмоза. Отирлӧ отсалӧны, кыдз вермӧны. КЧС уджалӧ черезвычайнӧй режимын, дежуритӧны быд территория вылын. Отирӧс эвакуируйтӧны.