Коми-пермяков накормили солдатской кашей

В Кудымкаре отпраздновали день Победы!

Кудымкар, кыдз и мушар вылісь уна мӧдік каррез, панталіс Победалісь сизимдас первӧй годовщина гажӧна и торжественнӧя.

Россия пасьта куим миллионся унажык морт таво сувтісӧ бессмертнӧй полкӧ. Кудымкарын нія вӧлісӧ тысячаа. Пантавны ВОВ-ын вермӧмлісь лун ӧксисӧ быдӧнныс, кин донтӧ Победалісь праздник, гордитчӧ дорйиссезӧн и аттьӧалӧ ветераннэзӧс. Кудымкарын «Бессмертный полк» нима общественнӧй акцияын участие примитісӧ унажык отирыс, нежели одззася годдэзӧ.  Отир петкӧтісӧ баббезлісь, деддэзлісь да прадеддэзлісь портреттэз ӧтік полкӧ. Зоннэз и ныввез видзисӧ киэзаныс фотографияэз нылісь, киннэз пыр лоасӧ ловьяӧсь, этӧ нія роднӧйез и тӧдсаэз, киннэз вермисӧ пемыт, лёк луннэз, вермисӧ война.

Великӧй Отечественнӧй война вылӧ Коми-Пермяцкӧй округись мунісӧ куимдас кык тысяча гӧгӧр морт, гортӧ бӧр бертіс  ныись дзир куимӧт торыс.

Мемориальнӧй комплекс вылын касьтылісӧ быдӧс победителлезӧс, киннэз эз локтӧ фронт вывсянь. Поздравленнеэзӧн и бытшӧм кыввезӧн ветераннэз да карись оліссез дынӧ шыӧтчисӧ юраліссез. Шоныт кыввез примитісӧ ВОВ-лӧн даснель ветеран, сымдаӧн нія локтісӧ праздник вылӧ.

Вежалунлӧн мӧдік торрез ыджыт культурнӧй программаэзӧн чулалісӧ кафе, Театральнӧй площадь да КДЦ одзын. Эз орддьы Победалісь лун и традиционнӧй солдатскӧй каша.