Жил-был художник

В выставочном зале КДЦ открылась выставка, посвященная 70-летию со дня рождения комипермяцкого художника Виталия Онькова.

«Художники Пармы» объединеннеись художниккезлöн оссис виль выставка. Творческöй событие йитöм тöдчана живописец-график, Виталий Оньковлöн сизимдасгодся юбилейкöт.

Художниккез вились касьтылöны ассиныс соратникöс, ёртöс и талантливöй живописец-графикöс. Виталий Оньковлö коллегаэз посвящайтöны ассиныс медбур уджжез. Эта выставкаыс оссис видзöтiссез понда «Жил был художник» нимöн. Виталий Оньковсянь отир тöдсасьöны мöдiк талантливöй художниккезкöт.

Виль выставка вылын мыччалöмöсь паськыт графическöй материаллэз. Эстöн граффити, карандаш, гравюра, пастельнöй набросоккез, акварельнöй и гуашевöй уджжез. Быдöс сiя, мыйöн любитö уджавны эта или мöдiк художник. Рисуйтöмыс вöрзьöтö сьöлöм.

Кыдз торйöтчисö асьныс авторрез, видзöтiссез одзö нiя петкöтiсö меддонасö, медассямасö и бытшöмсö, сiйö, мый натьтö унаэз эз видзчисьö, сiйö, мый  осьтас художниклiсь секреттэз и вермас донтсьыны быднежа: критика сорöн или жö восторгöн.

Öнi асланыс олан, интерессэз и рисуйтöмыс йылiсь талантливöй отир висьтасьöны йöзлö. Именно эттшöм выставка карын осьтiсö первуись. Медодзза видзöтiссезлö, кöдна локтiсö выставка осьтöм вылö, «Художники Пармы» объединеннеись художниккезлöн уджжез гленитчисö. Зрительлöн суд вылö петкöтöмöсь не öтiк дас творенне, желающöйезлö туйö локны тöдсасьны эта ыджыт выставкакöт июль дасвитöт лунöдз.