Золотые ОДН

Юлия Лоскунина уже нёльöт месяц ни пукалö масiссезöн, но некытшöм романтика йылiсь сёрни эстöн оз мун. Эшö мöйму сылöн квартира вöлi орöтöм би дынсянь. Причинаöн лоис сiя, что эз понды вештiсьны общедомовöй освещенне понда. Инька кыввез сьöртi, квитанцияэзын доныс сы понда вöлi öддьöн ыджыт. Этшöм жö проблемаöн пантасисö и сылöн соседдэз.

Овны битöг нiя велалiсö ни. Холодильникын сёян туйö видзöны постельнöй белье. Сёянсö жö лöсьöтöны горын. Инька некыдз оз вермы вежöрты, мыля билöн отключенне бöрсянь ОДН понда счёттэс öнöдз локтöны и быдса объемöн.

А этö уже висьтасьö мöдiк керкуись Валентина Колбинева. Сылöн ситуацияыс немымда оз торьяв одззасяысся. Квартираны видзöм би понда вештö сё – сё витдас руб, а вот подъездiсь öтiк лампочка понда мукöдпыр колö вештыны куимсё витдас руб гöгöр. Нельки асьныс масiссез увтын пондылiсö лыддьыны, мымда жö нылö колö вештыны .

Электриккезлöн версия сьöртi, эстöн проблемаэз вермасö лоны либо важ электропроводка, либо ны увья, кин бисö просто гусялö. Этасянь и электроэнергиялöн потеряэс ыджытöсь. Ны понда и колö отирыслö вештыны. Кöть квартираэзын биыс орöтöм , закон сьöртi ОДН понда вештыны все равно колö. Начисленнеэзын нiя оз адззö некытшöм проблемаэз, но эта йылiсь баитöны дзик кадр сайын.

Öнi, мед бергöтны аркмöм долггесö, энергетиккез сетiсö судебнöй исккез. Пемытын да битöм кваритраэзын олiсь отир готовöсь дорйыны асьнысö помöдз. Нiя увереннöйöсь, что правдаыс лоас ны ладорын.