В Белоевском Доме культуры рухнул потолок

Очаги культуры на селе потихоньку стали потухать. Из-за аварийного состояния зданий некоторые уже закрыты, а многие из них разваливаются прямо на глазах. Так в Белоевском ДК средь бела дня рухнул потолок. По счастливой случайности никто не пострадал. В таком плачевном состоянии находятся многие учреждения культуры  Кудымкарского района.

Кытчö тарöвтчö культура? Верх-Юсьвинскöй культура керкулöн крыша ляпкалiс луншöрöн. Шогмöмлöн причинаöн лоисö важ конструкция да весöттöм лым. Уджалiссез кайны крыша вылö, мед сы вылiсь лэдзны лым, эз лысьтö. 

А мöйму ордча Ленинск посадын культуралöн очагыс вöлi  пöдналöм сы увья, мый сылöн зданнеыс вöлi öддьöн важ.

Таво виль проблема. И öнi Белоево посадын ни. Сэтчин культура керкуись концертнöй залын киссис потолок да разьсис стена. Бур, мый сы коста некин эз доймы.

Но эта вылö видзöттöг, репетицияэз мунöны одзлань. Сцена туйö челядьлöн ансамбль ассис концертнöй номерресö репетируйтö ордча помещеннеын. Кöть и эстöн потласьöны да киссьöны стенаэз, но сё жö невночка буржык, нежели концертнöй залас.  Кыдз шуö Василий Харин, сы йылiсь, мый  зданнеыс важмис и пондiс жагöник киссьыны, нiя баитлiсö юралiссезлö не öтiк год сьöрна ни, но ремонтыс сiдз эз и вöв керöм.

Коллективлöн кыввез сьöртi, этö не просто кыввез, быдöс син одзын. Виялö крыша, стенаэзын осьтаэз, кöдна пöдналöмöсь картон торрезöн. Ачыс зданнеыс вöлi строитöм эшö кольöм векся сизимдасöт годдэзö, сы бöрсянь капитальнöй ремонтыс эстöн керöм эз вöв. 

Мероприятиеэз эстöн чулöтчöны практически быд лун, сiдз жö эстöн уджалöны челядь понда быдкодь кружоккез. Öнi залыс пöдналöм. И мöдiк места, кытöн бы отирыс вермисö чулöтны ассиныс прос кад, посадын абу.  

Районлöн администрацияын босьны комментарийез эз пет. Юралiсьыс аслас уджалан места вылын эз вöв, а сылöн заммес – отпусккезын.  А поселеннеись юралiссез адззисö, кыдз туйö петны аркмöм ситуацияись, вöзйисö вуджны челядь садлöн важ зданнеö. И кöть сiя тожö аварийнöй, но невночка буржык. Одзжык вöлi планнэзын строитны культура керку понда виль зданне, но деньгаыс сэк эз адззись.

Абу сьöмыс и ремонт вылö. Кыдз шуö Василий Харин, кыдз отирыс, сiдз и коллективыс пондасö пессьыны виль зданне строитöм понда. Эд этшöм проблемаыс эм Кудымкарскöй районiсь культуралöн быд учрежденнеын.  И колö пондöтчыны мыйкö керны öнi ни, кытчöдз культуралöн храмыс эз ешты пöртчыны трагедиялöн местаö.