Живая глина Ивана Канюкова

Живая глина Ивана Канюкова. Народному мастеру Пермского края из села Белоево Ивану Ивановичу Канюкову  исполняется 60 лет со дня рождения. К юбилею мастера в Коми-Пермяцком краеведческом музее открылась его персональная выставка под названием «Живая глина».На выставке представлены керамические изделия и живописные работы, созданные мастером в разные периоды творчества.

 Иван Канюковлöн ловья сёй. Уна быдкодь енбиэзöн богат миян чужан му. Эмöсь и сьыліссез, и йöктіссез, и художниккез. Ны коласын Иван Иванович Канюковлö сетöм особöй места, эд сылöн профессия уникальнöй. Белоев посадісь мастер öтнас Пермскöй крайын уджалö керамикаöн. Таво сылö тырö кватьдас год, и этна луннэзö Коми-Пермяцкöй окружнöй музейын оссис сылöн персональнöй выставка, ним кöдалöн – «Ловья сёй» (Живая глина).

Поздравитны художникöс эта гора событиеöн локтісö матісь ёрттэз да дона гöссез. Гора нима мастер сетö ассис ловсö не дзир сёйлö, но и челядьлö: уна год велöтö нійö эта ремеслоö. И сідз кыдз Иван Иванович – мортыс паськыта остьöм сьöлöма, то и кыввез выставка осьтöм вылын горалісö медшонытöсь да югытöсь. А кöсйöммез коласын вöлісö дзир здоровье, оланын гаж да творчество.

Быдыслö, кин локтас эта выставка вылö, колö лоны осторожнöйöн, эд быдкодь рöма свиттялан сёёвöй чачаэз гусялöны синнэз, кöрталöны ас бердö сьöлöммез да дыр оз лэдзö. Сідз жö мыччалöмöсь татöн бытшöм сера бекöрпань, быдкодь народнöй паськöммеза мортоккез – фантазия уджалісьлöн лэбзьö ылына. Выставка лоö бур козинöн музейö локтіссез понда.

Енбиа мастерлöн енбиа и челядьыс: нія бöрйисö ассиныс туй эта жö профессияын, и öні мунöны ай следдэз кузя. Быдöс, мый пуктіс ны сьöлöмö ай, адззö примененнё оланын. Этö кыдз уникальнöй кужöммез, сідз и шынньöла отношеннё олан дынö. И кöть айлöн слава горалö ылына, сё жö сія оз мешайт адззыны ассяма туйез да осьтны вильсö.

Уна керöм эта зарниа киэзöн, но одзланься планнэз этасянь оз чинö, а дзир содöны. Бур, мый творчестволöн лов оз сет кужись киэзлö спокой. Сідзкö, лоасö виль рöммез, виль формаэз да виль впечатленнёэз.