«Россия» закончила уборочную страду

В СХПК «Россия» Кудымкарского района уборочная страда подошла к концу. Основная работа на полях завершена, теперь горячая пора настала в зерносушильных комплексах. Здесь зерно проходит через различные процедуры, после чего отправится на хранение в складские помещения.

«Россия» нима колхозын сю дзимлялöм сибöтчö ас пом дынö. Ыббез вылісь сю локтö косьтісьöм да сортируйтöм вылö. Кыдз эта процесс чулалö таво, видзöтö одзлань.

Кöр медшöр удж сю дзимлялöм сьöрті керöм ни, комбайннэз сетöны эстафета мöдік машинаэзлö. Татöн, зерносушильнöй комплекссэз вылын, сю видзчисьöны быдкодь процедураэз, кöдна бöрсянь сія мунас куйлыны складдэзö. Кыдз юöртіс агроном, норасьны тавося крожай вылö оз позь.

Медодз сю локтö приёмнöй площадка вылö, кысянь машинаэз пыр мунö первичнöй весöтöм. Сэсся сія киссьö кык аэрожолобö, кытöн сійö пöльтöны, но озö шонтö кык вентилятор. Сю дынö татöн особöй отношеннё, эд сійö быдтöны кöдзыс вылö. Сія шусьö питомник. Институттэзісь небöм сю быдтöны и размножайтöны, мед вузавны мöдік хозяйствоэзлö. Сю татісь мунö не дзир округ пасьта, но и сы границаэз сайö: Верещагинаö, Тюменьö и нельки Белоруссияö. Удж почти быдсöн механизируйтöм, сійöн позьö висьтавны, мый чулалö кокнита. Этаын ассяма отсöт сетö и бур погоддя.

Медшöр удж водö машинаэз вылö, отир жö киэзöн керсьö дзир неуна. Хозяйствоöн юралісь уна керö сы понда, мед удж понда вöлісö керöмöсь медбур условиеэз. Эта бригадаын уджалöны нёль морт-специалист, кöдна бура тöдöны ассиныс удж.

Сю татöн косьтöны кык линия вылын. Кык ыджыт короббезісь, кытöн сія косьмö, осьтöны öшыннэз, и сю киссьö му вылö, кысянь кайö машинаэзö, кöдна сортируйтöны сійö. Сортировка бöрсянь трактор нöбöтö сійö складдэзö, кытöн сю куйлö одзланься реализацияöдз. Тавося сю дзимлялöм гажöтö отирöс сійöн, мый керсис аскадö, эд сэтшöмыс овлö шоча.

Сідз, позьö висьтавны, урожай шогмис бурöн. Дзимлялöм бöрсянь татöн кутчасö кöдзны öзимöй рудзöг, дзимлявны клевер подалö тöвся сёян понда – уджыс эстöн пыр мунö пизьöмöн. А уджыс сьöрті и олан.