Зарядка со стражем порядка

Полицияись уджаліссез отсалöны карись челядьлö зорöтны ас пытшкын оланлöн здоровöй образ дынö радейтöм и медодз керöны этö асывся зарядкасянь.

Гажöна и бодрöя пондöтчис талуння асыв первöй номера школаись челядёккезлöн. Шондісö нія панталісö зарядкаöн, и öтлаын ныкöт тыртны сьöлöм  быдса лун кежö бур настроеннёöн локтісö и полицияись уджаліссез. Не медодззаись сэтшöм мероприятие чулöтсьö «Гражданин» нима лагерьын, кöда уджалö татöн, и нöбöтö ассяма моггез.

Формаэза отир вылö видзöттöн, челядь öддьöн бура старайтчисö керны быдöс бура, сідз жö кыдз ыджыттэз. Нія ештісö и котрасьыштны, и керны разминка юрсянь коккезöдз. Мед зарядка эз вöв простöйöн да гажтöмöн, том спортсменнэз не дзир керисö упражненнёэз, а эшö козьналісö öтамöдлö шынньöввез.

Упражненнёэз челядьлö мыччаліс Ольга Четина. Нывка ачыс радейтö спорт да физкультура, сійöн челядькöт сэтшöм пантасьöмлö вöлі öддьöн рад.

Челядь сэтшöм акцияись сідз жö петкöтісö ас понда дзир бурö: ассяма гажа зарядка, матынжык тöдсасьöм полицияись уджаліссезкöт, мича асыв – быдöс эта лэбтіс нылісь настроеннё и желаннё керны ас олан здоровöйöн.

Одзлань челядьлöн да правоохранительнöй органнэзісь уджаліссезкöт планируйтöмöсь эшö и мöдік уна быдкодь мероприятиеэз, кöдна коласын нельки футбольнöй матч. Позьö надейтчыны, мый сэтшöм акцияэз отсöтöн челядьын саймас охота служитны полицияын.