Палитра Пармы

«Палитра Пармы» - Под таким названием в выставочном зале культурно-делового центра открылась новая выставка. На ней представлены работы  коми-пермяцких художников.

Пармаись художниккезлöн виль выставка. Виль выставка, кöда оссис карись культурно-деловöй центрись выставочнöй жырын, мыччалö уджжез коми-пермяцкöй художниккезлісь да шусьö «Палитра Пармы». Ны понда, кин уджалö карандашöн да краскаэзöн, сія лоис традиционнöйöн, эд сэтшöм выставкаэз чукöртсьöны быд год.

Быд художниклöн ас гöгöрся дзар аслас, сія оз вачкись мöдіккез вылö. Кинкö гижö югыт, шоныт рöммезöн, а кинлöкö сьöлöмви пемыт да кöдзыт краскаэз. Унажык татöн уджжез, кöдна мыччалöны пейзаж, картинаэз деревенскöй оланісь. Эмöсь и гажа натюрморттэз. Невна торйöтчöны шöр темасянь картинаэз, гижöмöсь Вячеслав Вакинлöн. Зэв ассямаöсь, ылынсянь видзöттöн нія кажитчöны ловьяэзöн и кыскöны ас дынö дзаррез да сьöлöммез.

Выставка – этö художниккезлöн виль пантасьöм, кöдналöн пыр эм мыйöн торйöтчыны öтамöдкöт. Эта öксьöм вайис сьöрас не дзир гажа думаэз, но и важся шоггез, кöдна пукалöны ловын и озö сетö спокой.

Художниккез сё жö адззöны вын гижны картинаэз, вуджöтны холст вылö думаэз да адззылöмсö. А кöркöся удж йылісь касьтывлöны гажтöм шынньöввезöн чужöммез вылын.