Я б в учители пошел, пусть меня научат

В учебных заведениях среднего профессионального образования начали свою работу приемные комиссии.

Приемнöй комиссияэз ванйöвтiсö ассиныс ыбöссэз. Ны понда, кин таво помаліс школа, локтіс некокнит кад. Колö бöрйыны одзланься туй, а нія оссьöны неетша. Кудымкарись велöтчан заведеннёэзын уджалöны ни приёмнöй комиссияэз, кöдналö эм мый сетны бöрйöм вылö абитуриенттэзлö. Сідз, Коми-Пермяцкöй аграрнöй техникумын приёмнöй комиссия жырын асывсянь кытчöдз лöнь, но эта вылö видзöттöг, заявленнёэз томпöлöссянь примитöмöсь уна ни.

Аслас удж пондöтöмсянь татісь приёмнöй комиссияöн примитöм ни куимдас гöгöр морт, сідзкö, интерес лоан студенттэзлöн эта велöтчан заведеннё дынö пым. Пым сія и виль профессияэз дынö, кöднаö агротехническöй техникум мöдö велöтны ассис студенттэзöс виль велöтчан годö.

Эта кадö Кудымкарскöй педагогическöй колледжын абитуриенттэзісь аркмис нельки неыджыт очередь: томпöлöс, кöдна мöдöны лоны велöтіссезöн, уна. Причинаэз, кöдна увья нія бöрйисö этö профессиясö, быдыслöн ассямаöсь.

Абитуриенттэзсянь заявленнёэз примитöм сьöрті удж мунö татöн кыдз пыр: отсалöны гижны колана гижöттэз, вежöртöтöны, ежели мыйкö невежöртана. Быд локтісь дынö внимательнöй отношеннё, эд сія локтіс керны ассис бöрйöм.

Удж пизьö, сідзкö, лоан велöтчан годö, быдöс группаэз лоасö тыртöмöсь. Быд лун татöн мунö лыддьöм. А тöдны, кытшöм тэнат шанссэз поступитны, туйö нельки гортісь петтöг.

Нылö, кин бöрйис ни ассис туй да профессия, колö лöсьöтчыны гажа да виль тöдöммеза студенческöй олан кежö. А ны понда, кин жугдö эта юасьöмöн юр, кадыс эшö эм. Приёмнöй комиссияэз уджалöн август шöрöдз.