Сельхозперепись стартовала

Быдсöн Россия пасьта статистикалöн службаэз пондöтісö Всероссийскöй сельскохозяйственнöй перепись сьöрті удж. Вот и Кудымкарскöй отделеннёын одз асывсянь пизьö удж: сетсьöны медбöрья инструкцияэз да гижöттэз, лöсьöтчöны гижöтіссез.

Удж пондöтчис. Татьяна Ведерниковалö гижöтан участок дöнзис неучöт, и медперво сія муніс тöдсасьны Хорошева нима улица вылісь оліссезкöт. Сылöн мог – пыравны быд керкуö да öктыны быдкодь пода да садитöм карч йылісь сведеннёэз. Но не быдлаын петö сідз, кыдз колö.

Оз позь висьтавны, мый гижöтісьлöн уджыс кокнит. Дас семья – этö öтік лун понда норма. Но эта Татьяна Борисовнаöс оз повзьöт. Мортыс сія кокнит характера, и уже мöдік ыбöсö ёркöтчöм бöрсянь шогмö бытшöм сёрни.

Гижöттэзö пырö быдöс: кыным сотка му, мый сы вылын садитöм, кытшöм видзсьö пода да уна мöдік юасьöммез. Нем оз кольччы бокö, эд быдöс öктöм информация öддьöн важнöй. Лыддьöм бöрті сія сетас картина сельскöй хозяйство йылісь быдсöн страна пасьта и сы сьöрті позяс лöсьöтны одзланься политика эта ладорын.

Миян гижöтісь кыввез сьöрті, уджыс сылö гленитчö,  кöть и сія невна полöтана, а гижöтö Татьян Ведерникова первуись. Но желаннё керны быдöс бура да аслас срокö сылöн эм.