В д. Бачманово прошел VII Межмуниципальный фестиваль обрядовых культур «Гаврилов день»

Июль кыкдас кватьöт лунö Косинскöй районiсь Бачманово да сы гöгöрись деревняэзын олiссез петiсö юрбитны поклоннöй крест дынö. Годiсь годö этшöм молебеныс татöн чулöтчö Гаврилов лунö. Кыдз висьтасьöны деревняын олiссез, преданнее сьöртi эта традицияыс чужис кытöнкö сё годöн  одзжык. Сэк деревняын мор увья пондiсö кувны мöссэз да вöввез. Мед кöть кыдзкö пессьыны пода бердö кутчисьöм шогкöт, отирыс пондiсö кеймыны вежа Гаврииллö, кöда лыддиссис вöввезлöн покровительöн. Юрбитöм да кеймöм бöрын кувны подаыс дугдiсö. Татьяна Трубинова ветлöтö молебен вылö дас годсянь. Öнöдз видзö сiя тöдвылас, кыдз кватьдасöт годдэзö этшöм вежалуннэсö чулöтны эз лэдзö. Но мый бы эз вöв, а отирыс эта лунö крест дынö юрбитны все равно ветлöтiсö. 

Чулöтöны этö обрядсö и öння кадö. Одз асывсянь мунöны кеймыны вежа Гавриилö, а сэсся миссьöны асьныс да миссьöтöны вöввесö югдöтöм ваын. Этадз отирыс дорйöны подасö быдкодь шогöттэзсянь.

Ну а сэсся мунöны быдöнныс деревня кузя, кытöн пондöтчö öтласа гажöтчöм. Кöда коста сьылöмöн да йöктöмöн отирыс висьтасьöны асланыс олан йылiсь. Вежалун коста быдöнныс сувтöны öтласа кытшö, кытöн сьыланкыввезöн да йöктöмöн гажöтчисö сер рытöдз. 

Татьяна Трубинова шуö, мый и мöдiгод отирыс вились öксясö бачмановскöй му вылын. Эд этна муэз вылын олiсь отир понда этö не дзик вежалун, но веритöм, что Енлö да вежа Гаврииллö кеймöм отсалас нылö орддьыны быдöс шоггесö да умöльсö.