Зерновые поспели!

На Кудымкарском сортоиспытательном участке  поспели зерновые. Теперь здесь готовятся к уборочной страде. Предприятие работает не только с сельхозпредприятиями коми округа, но и других районов Прикамья.

Кудымкарскöй сортоиспытательнöй участок вылын лöсьöтчöны дзимлявны сю. Кудымкарскöй сортоиспытательнöй участоклöн зона зэв паськыт: сія быдтö испытаннёэз понда сю не дзир округись хозяйствоэзлö, но и уджалö Соликамскись, Карагайись да мöдік пельöссэзісь хозяйствоэзкöт. Делянкаэз вылын – сідз шусьöны му торрез, кöда вылын быдмö сю, почти быдöс готов дзимлялöм кежö.

Быд делянка вылын быдмö ас культьура да сорт, а нія татöн унаöсь. Сідз, идсö таво кöдзисö кыкдас сорт гöгöр. Сортоучастокись уджаліссезлöн удж лоö öддьöн важнöйöн, эд сыись петöны колана миян условиеэз понда сорттэз. А сы понда, мед быд делянка вылісь получитны бур урожай, нылöн эмöсь ассяма секреттэз.

Испытаннё понда быдтöны быдкодь сорттэз, кöдналöн эм ас ним, и география нылöн сідз жö зэв паськыт.

Не дзир сюэз понда татöн нуöтсьö ыджыт селекционнöй удж. Медбур сорттэз петкöтöм понда быдтöны и мöдік культураэз, кöдна коласын эм и картов. Сетас я сія таво бур урожай, висьтавны сьöкыт.

Конечно, сы понда, мед пондöтны испытаннёэз, колö медперво сюсö быдтыны. А уж сэсся пондöтчас мединтереснöй удж – бöрйöм, меряйтöм да донтöм.

Öні медшöр задачаöн лоö сюэз дзимлялöм. Чожа, кöр быдöс хозяйствоэз петасö ыббез вылö, татöн пондас керсьыны сія жö удж, мед медбур сорттэз адззисö ассиныс хозяинсö.