Гуляй, село, чтобы было весело

В старинном селе Кува Кудымкарского района отметили день села. Чулалöм шоччисян луннэзö Кува посад öктіс дынас оліссесö да гöссесö, мед пантавны посадлісь лун. А сідз кыдз тöдчана местаöн татöн лоö пруд, то и пондöтчис вежалун чериалöмсянь. Ассяма вермасьöм лоис интереснöйöн отир понда.

Вермасьöм, кöдаын примитісö участие кыкъямыс гöгöр черикыйись, чулаліс гажöна да чожа, но колис нійö добычатöг, эд жар да кöс погоддя увья черисö участниккезлö вöр-ва эз козьнав. Эта немымда эз тшыкöт отирлісь настроеннё, посад шöрын нійö видзчисисö уна мöдік гажöтчöммез. Сьыліссез сьöлöмсянь козьналісö отирлö ассиныс сьыланкыввез. Ны коласын радейтана посаднысö поздравляйтіс гажа нывкаоккезлöн чукöр, кöда шусис «Звонкие нотки».

Кува посад богат ас историяöн: кöркö татöн уджаліс Строгановвезлöн чугунно-плавильнöй завод, вöлі ыджыт именнё. Öні нія лоöны дзир историялöн объекттэзöн, но сё жö öктöны ас гöгöр уна вниманнё. Посадісь пöрись оліссез уськöтісö тöдвылö быдкодь тöдчана событиеэз, эд нія татöн вöлісö неетша.

Конечно, öння олан посадын невна мöкодьжык, но отир, кöдна олöны татöн, любитöны ас чужан му, быдкодя басöксьöтöны да керöны сійö буржыкöн. Сідз, быдöн радейтана пруд неважын вöлі вайöтöм колана состояннёö, и öні сія лоö посадлöн визитнöй карточкаöн. Этася посадын керсьö и мöдік удж благоустройство сьöрті.

Эта лунö отир козьналісö ас посадлö дзир шоныт кöсйöммез. Шоччисьöм эта лунö вöлі быдладорся: нылö, кин любитö спорт, позис орсыштны волейболöн, ва вылын позис уялыштны пыжöн, фотографируйтчыны керöм эта понда зонаэзын нето просто сідз ветлöтыштны берег дорöт. Ветлöтіссез коласын мукöдпырся пантасьлісö нельки отир мöдік векись.

Посадлöн лунö вöлісö пасйöмöсь и сылöн тöдчана отир. Семьяэз, челядь да мöдіккез, нія, кин ас оланöн да уджöн бурсьöтö посад, примитісö творческöй козиннэз.

Сё кватьдас (сто шестьдесят) годся унажык посад сулалö Кува ю весьтын, олö да видзöтö одзлань. Кöсъям, мый одзза годдэза нимлуннэсö сія панталіс  сё гажажыка да буржыка.