«Зажинки» - праздник первого снопа

В десятый раз в Юсьвинском районе отметили праздник первого снопа «Зажинки».

Медодзза кольталöн вежалун. Кыдз и пыр сьыланкыввезöн отир осьтiсö сюэз вундöмлiсь «Зажинки» нима важ обряд. Сiя видзö ас пытшкас кыдз языческöй, сiдз и христианскöй обычайез. Вундыны сю чарлаöн Любовь Куданина кужö челядь кадсянь. Кыдз и мöдiк участниккез, сiя вермас мыччавны кыдз правильнöя колö сувтöтны кольтасö.

Август шöр - этö сюэз дзимлялöмлöн кад. «Зажинки» вежалун лоö бур пасöн сылö, мый сюыс таво лоас бур. Сiдз жö обрядыс уськöтö отирлö тöдвылö, кытшöм сьöкыта сетчис одзжык эта уджыс. Эд эшö кватьдасöт

годдэзö öтiк ыб вылас петавлiсö кыксё гöгöр мортöдз и уджалiсö одз асывсянь пемытöдз.

Öнi обряд чулöтöм бöрын ыббез вылö петöны комбайннэз. Колхоз сюэз вундöм кежö готов. А вежалунлöн символöн лоö нянь. Вот и сцена вывсянь горалiсö сьыланкыввез, кöдна сьылöтiсö пызан вылiсь медшöр сёянсö.

Ну а неылын местнöй мастеррез петкöтiсö отир син одзö пуись вундалöм ассиныс уджжезнысö да коми-пермяцкöй паськöмлiсь виль моделлез. Быд желающöй вермис примитны участие набойка сьöртi мастер-классын.

Таво медодзза кольталiсь вежалун Юсьвинскoй районын порйöтöны дасöт пырся ни. Мыччавны ассиныс кужöммез кольта керöмын Архангельск посад дынiсь обрядовöй ыб вылö локтiсö отирыс быдсöн район пасьтаись.

Отсалас я обрядыс сюэз вундöмлö да бур урожай шедтöмлö, лоас тöдса сёрöнжык, кöр быдöс сюыс лоас дзимлялöм складдэзö ни. Ну, а сiя жö Любовь Куданина шуö, мый сюыс, нельки засуха вылö видзöттöг, таво лоас сэтшöм жö бур, кыдз и одззася годдэзö